AGP, Sezione Giuridica, 111/15084

ERECTIO CANONICA SOCIETATIS SACERDOTALIS SANCTAE CRUCIS

DECRETUM

Quindecim abhinc annos pius ac zelans hujus Matriten Dioecesis Sacerdos, Doctor D. Joseph Maria Escrivá de Balaguer et Albás, favente ac benedicente Ordinario Dioecesano, Institutionem condidit, cujus sodales, praeter propriam cujusque sanctificationem, servatis Evangelii consiliis in munere professionali exercendo obtinendam, hunc, quamvis non unicum, specificum finem sibi proposuerunt: enixe adlaborare ut selectam partem virorum professionum intellectualium, quibus natura competit societatem civilem dirigere, ad fidei catholicae principia revocarent et ad Evangelicam perfectionem suaderent.

Novam hanc Institutionem -quae, ob singularem et propriam consociationem "OPUS DEI" appellata, proprium finem omni contentione est ubique prosequutaapprime temporum nostrorum et nostrae Patriae necessitátibus urgentissimis respondere nemini non apparuit. Omnes enim fatentur, re¡ publicae eversionem, quae universam fere Hispaniam nuper cruentavit, desertioni a doctrina et praeceptis Christi hominum "intellectualium" esse magna ex parte adstruendam, quippe qui doctrinis dissolventibus per tot lustra juventam studiosam inquinarunt.

Cui piae Institutioni divinus favor jam inde a primordiis constans adfuit, sese praecipue manifestans tum numero et qualitate ad eadem advolantium juvenum e integritate aeque ac ingenio florentium, tum fructibus uberrimus ubivis ab eadem collectis, tum denique signo contradictionis, quae operum Dei sigillum exstitit. At vero, succrescentibus in dies Institutionis membris, ejusdemque mirum in modum extenso activitatis ambitu, visum est, scopum, constitutionem et methodum actionis intra fines simplicis Associationis ulterius contineri non posse, sed ampliorem et firmiorem exigere rationem verae Societatis Ecclesiasticae legitime erectae et constitutae. Sic enim, dum diversae Institutionis activitates organice coordinabuntur, ipsa Hierarchiae intimius haerebit, necessariam internam authonomiam comparabit et firmitatem sanctionis nedum Ordinarii loci verum etiam Sedis Apostolicae nanciscetur.

Re igitur mature perpensa, pro Nostro offlcio, universum negotium ad Apostolicam Sedem retulimus, a qua, per S. Congregationem de Religiosis, telegrapho prius, dein vero litteris authenticis diei 11 octobris 1943, sub n.' 2777/43, responsum accepimus, nihil ab eadem Sede Apostolica obstare quominus ad optatam erectionem canonicam praedictae piae Associationis deveniremus .

Quapropter, facultatibus cc. 674, 492, § 1, concessis utentes, laudatam piam hucusque Associationem, a Nobis ut talem jam antea adprobatam, in veram Societatem juris Dioecesani ad normam t. XVII 1. II Codicis Juris Canonici erigimus atque constituimus sub nomine SOCIETATIS SACERDOTALIS SANCTAE CRUCIS, in finem compendio Statutorum Sanctae Sed¡ submisso sat expressum et mediis ibidem relatis obtinendum. Haec autem Societas Sacerdotalis Sanctae Crucis erit ad normam juris communis Nobis Nostrisque Successoribus plane subjecta (c. 492, § 2). Ut vero efficacius intentos effectus Societas consequatur, volumus ac edicimus ut, firmo compendio Statutorum Sanctae Sed¡, ut diximus, delato, ejusdem Societatis ampliores et completiores Constitutiones exarentur Nostrae adprobationi subjiciendae.

Hujus decreti canonicae erectionis Societatis Sacerdotalis Sanctae Crucis, manu Nostra subscripti Nostroque sigillo muniti, tria exscribantur exemplaria: primum ad Sedem Apostolicam remittendum, alterum Rvdo Moderatori Societatis tradendum, tertium denique in Archivo Curiae Episcopalis ad perpetuam re¡ memoriam asservandum.

Matriti, in die festo Immaculatae Conceptionis B.V.M., 8 decembris 1943.

+ Leopoldus, Episcopus Matriten.-Compluten.

L + S                                 J. Marco

Cancell.

Indice del Apéndice Documental de “El itinerario jurídico del Opus Dei. Historia y defensa de un carisma”.

Volver al índice general de “El itinerario jurídico del Opus Dei. Historia y defensa de un carisma”.